مەملەكەتتىك قىزمەت سالاسىندا ادامي رەسۋرستاردى باسقارۋ بويىنشا وزىق تاجىريبە الماسۋ ماقساتىندا شەتەلدىك ارىپتەستەرمەن ىنتىماقتاستىق ورناتىلىپ جاتىر.
وتكەن جىلى اقش-قا ءىسساپار اياسىندا مقىا توراعاسى دارحان جازىقباي اقش-تىڭ كادرلىق قىزمەت ءوفيسىنىڭ ديرەكتورى روب شرايۆەرمەن كەزدەستى. تاراپتار ءوزارا تۇسىنىستىك تۋرالى مەموراندۋمعا قول قويىپ, مەملەكەتتىك قىزمەتتەگى ادامي الەۋەتتى ارتتىرۋدىڭ ماڭىزدىلىعى تۋرالى كەلىسىمگە كەلدى.
اتالعان كەلىسىم نەگىزىندە 2025 جىلعى 20 قاڭتاردان باستاپ قازاقستان رەسپۋبليكاسىنىڭ توتەنشە جاعدايلار سالاسىنداعى مەملەكەتتىك قىزمەتشىلەرى مەن قىزمەتكەرلەرى ءۇشىن «داعدارىستى باسقارۋداعى كوشباسشىلىق» تاقىرىبىندا ونلاين فورماتتاعى ءۇش كۇندىك وقىتۋ كۋرسى وتۋدە.
وقىتۋشىلار رەتىندە اقش-تىڭ ءتۇرلى ۆەدومستۆو باسشىلارىنىڭ بىلىكتىلىگىن ارتتىرۋ باعدارلامالارىن جۇزەگە اسىراتىن فەدەرالدى اتقارۋشى بيلىك ينستيتۋتىنىڭ پروفەسسورلارى تارتىلدى.
قازاقستان تاراپىنان وقىتۋدان 57 مەملەكەتتىك قىزمەتشى, ياعني توتەنشە جاعدايلار مينيسترلىگىنىڭ باسشىلىق قۇرامى جانە جەرگىلىكتى تابيعي رەسۋرستاردى قورعاۋ سالاسىنىڭ باسقارما باسشىلارى ءوتتى.
اتالعان اۋديتوريا سوڭعى بىرنەشە جىل ىشىندە ەلىمىزدە بولعان تابيعي سيپاتتاعى توتەنشە جاعدايلارعا جانە اقش-تىڭ وسىنداي جاعدايلاردى باسقارۋداعى باي تاجىريبەسىنە بايلانىستى تاڭداپ الىندى. وقىتۋ اياسىندا تىڭداۋشىلارمەن اقش-تىڭ جانە قازاقستاننىڭ توتەنشە جاعدايلار كەيستەرى نەگىزىندە ينتەراكتيۆتى تالقىلاۋلار ءوتتى.
